Во организација на Дипломатскиот клуб-Скопје и Здружението на ветерани и резервисти од одбраната и безбедноста на Република Северна Македонија (ЗВРОБ), на 13 март 2025 година во Домот на армијата, се одржа трибина на тема „Пет години членство на Република Северна Македонија во НАТО: постигнувања, перспективи и предизвици“ со што двете здруженија даваат свој придонес кон одбележувањето на овој јубилеј и ја потврдуваат нивната посветенот кон стабилноста, безбедноста и демократијата на нашата земја.
Министерот за одбрана, Владо Мисајловски во воведното обраќање ја нагласи важноста од членството на нашата држава во НАТО и се осврна на активностите што се преземаат за реформи во одбраната, за јакнење и модернизација на нашите безбедносни и одбранбени капацитети, согласно стандардите на НАТО и зголемување на интероперабилноста на нашата армија во справување со современите безбедносни предизвици, при што го подвлече фактот што државата издвојува 2% од буџетот за остварување на поставените цели.
На трибината, којашто ја водеа потпретседателот на Дипломатскиот клуб Сања Зографска и проф.д-р Ѓорѓи Тоновски, настапија генералите во пензија Илија Николовски и д-р Павле Арсовски, претседател со Комисијата за одбрана во Собранието на РСМ, амбасадорката Шпреса Јусуфи и дипломатот д-р Зоран Тодоровски. Во своите обраќања тие зборуваа за патот на нашата земја кон приемот во полноправно членство во НАТО а што претставува најголемиот придонес за безбедноста и стабилноста на нашата држава и гаранција на нејзиниот територијален интегритет и суверените, особено во сегашните услови на геополитички превирања и нестабилност. Тие се осврнаа и на нашите идни обврски како членка на НАТО, понатамошната улога на НАТО во зачувување на мирот и безбедноста во регионот, во Европа и пошироко и предизвиците на тој пат, како и политички, безбедносни, економски и технолошки промени коишто го обликуваат меѓународниот поредок и влијаат врз надворешната и безбедносната политика на нашата земја.
